മനുഷ്യൻ്റെ സ്വതന്ത്രമനസിനെയും (free will) കൃപയെയും (grace) സംബന്ധിച്ചാണെങ്കിൽ ചില കത്തോലിക്കരുടെ വാദം ഇങ്ങനെയാണ്. ആദം ആദ്യപാപം ചെയ്യുകയും അതു (ഭൗതികതിന്മയും ധാർമികതിന്മയും) മനുഷ്യവംശത്തെ മുഴുവനും ബാധിക്കുകയും ചെയ്തു. പാപം ചെയ്യാൻ 'സമ്മതം കൊടുത്തത്' ആദവും ഹവ്വയും മാത്രമായിരുന്നു. അതിൻ്റെ ഫലമായി മനുഷ്യവംശം മുഴുവനും സഹിക്കേണ്ടിവരുന്നു. ഒരു മനുഷ്യൻ്റെ സ്വതന്ത്രമായ തെരഞ്ഞെടുപ്പു സകലമനുഷ്യരുടേയും പതനത്തിനു കാരണമായെങ്കിൽ മറ്റൊരു മനുഷ്യൻ്റെ (മനുഷ്യാവതാരം ചെയ്ത ദൈവപുത്രനായ യേശുവിൻ്റെ) സ്വതന്ത്രമായ തീരുമാനം നിത്യജീവൻ കൊണ്ടുവന്നു. അതുകൊണ്ടു മനുഷ്യരുടെ ഭാഗത്തുനിന്നു വ്യക്തിപരമായ സമ്മതം ആവശ്യമില്ല എന്ന് അവർ വാദിക്കുന്നു. നമ്മുടെ കർത്താവായ യേശുക്രിസ്തു തൻ്റെ സ്വതന്ത്രമനസ്സിൽ ദൈവത്തോടു 'അതെ (Yes) ' പറഞ്ഞുകൊണ്ട് എല്ലാ മനുഷ്യരെയും രക്ഷിച്ചു. അതിനാൽ ആരും നരകത്തിലേക്കു പോകില്ല. എന്നാണ് അവരുടെ വാദം (യൂണിവേഴ്‌സലിസം).ഇത്തരം സിദ്ധാന്തങ്ങളെ , ഒരു കത്തോലിക്കാ മെത്രാനെന്ന നിലയിൽ അങ്ങ് എങ്ങനെ വിലയിരുത്തുന്നു ?

 

 

മനുഷ്യരുടെ ഭാഗത്തുനിന്നു വ്യക്തിപരമായ സമ്മതം ആവശ്യമില്ലെന്നും നമ്മുടെ കർത്താവായ യേശുക്രിസ്തു തൻ്റെ സ്വതന്ത്രമനസ്സിൽ ദൈവത്തോടു ' അതെ (Yes) ' പറഞ്ഞുകൊണ്ട് എല്ലാ മനുഷ്യരെയും രക്ഷിച്ചതിനാൽ ആരും നരകത്തിലേക്കു പോകില്ല എന്നും ചിന്തിക്കുന്നവർ പാഷാണ്ഡതയാണ് [Heresy] പ്രചരിപ്പിക്കുന്നത്. കാരണം മനുഷ്യാത്മാവിനു നിത്യശിക്ഷ ലഭിക്കാനുള്ള സാധ്യത എന്നതു ദൈവികമായി വെളിപ്പെടുത്തപ്പെട്ട സത്യമാണ്. സഭ ഇക്കാര്യം അപ്രമാദിത്വത്തോടെ ‌ വ്യക്തമായും കൃത്യമായും പഠിപ്പിക്കുന്നുമുണ്ട്. " നരകം എന്നൊന്നുണ്ട്. അനുതപിക്കാത്ത മാരകപാപങ്ങൾ മൂലം നരകശിക്ഷയ്ക്കു വിധിക്കപ്പെടുന്നവർ ദൈവനീതിയാൽ അവിടെ നിത്യകാലം ശിക്ഷിക്കപ്പെടുന്നു (മത്തായി 25: 46 കാണുക).

 

 

വിശുദ്ധഗ്രന്ഥം പഠിപ്പിക്കുന്നതനുസരിച്ച് നിപതിച്ച മാലാഖമാർ മാത്രമല്ല മനുഷ്യാത്മാക്കളും നിത്യശിക്ഷയിലേക്ക് പോകുന്നുണ്ട് ( 2 തെസ. 1:9, 2 പത്രോ. 3:7 കാണുക). കൂടാതെ നിത്യശിക്ഷയ്ക്കു വിധിക്കപ്പെട്ട മനുഷ്യർ ഒരിക്കലും ഇല്ലായ്മ ചെയ്യപ്പെടുന്നില്ല. കാരണം അവരുടെ ആത്മാക്കൾ അനശ്വരങ്ങളാണ്.അഞ്ചാം ലാറ്ററൻ എക്യൂമെനിക്കൽ കൗൺസിൽ സെഷൻ എട്ടിൽ ഇക്കാര്യം സഭ അപ്രമാദിത്വത്തോടെ പഠിപ്പിക്കുന്നുണ്ട്,

[Furthermore, the eternally damned human beings will not be annihilated, since their souls are immortal according to the infallible teaching of the Church (see Fifth Lateran Council, sess. 8)]

 

 

കത്തോലിക്കാ സഭയുടെ മതബോധനം പഠിപ്പിക്കുന്നു: " അനുതപിച്ചു ദൈവത്തിൻ്റെ കരുണാർദ്രമായ സ്നേഹം സ്വീകരിക്കാതെ മാരകപാപത്തിൽ മരിക്കുക എന്നതിനർത്ഥം നമ്മുടെ സ്വന്തം തീരുമാനമനുസരിച്ചു നിത്യകാലത്തേയ്ക്ക് ദൈവത്തിൽ നിന്നു വേർപെട്ടിരിക്കുക എന്നതാണ്. ദൈവത്തോടും വിശുദ്ധരോടുമുള്ള ബന്ധത്തിൽ നിന്നു സ്വയം തീരുമാനിച്ചെടുക്കുന്ന വ്യക്തമായ വേർപെടൽ ആണ് നരകം........ നരകത്തിൻ്റെ അസ്‌തിത്വത്തെയും അതിൻ്റെ നിത്യതയെയും കുറിച്ച് സഭാപഠനങ്ങൾ ഉറപ്പായി പ്രഖ്യാപിക്കുന്നുണ്ട്.

മാരകപാപത്തിൻ്റെ അവസ്ഥയിൽ മരിക്കുന്ന വ്യക്തികളുടെ ആത്മാക്കൾ മരണനിമിഷത്തിൽ തന്നെ നരകത്തിലേക്കു നിപതിക്കുന്നു. അവിടെ അവർ നരകശിക്ഷ - നിത്യാഗ്നി- അനുഭവിക്കുന്നു. നരകത്തിലെ മുഖ്യമായ ശിക്ഷ എന്നത് ദൈവത്തിൽ നിന്നുള്ള നിത്യമായ വേർപാടാണ്, ദൈവത്തിൽ മാത്രമാണല്ലോ മനുഷ്യനു ജീവനും സന്തോഷവും അനുഭവിക്കാൻ കഴിയുന്നത്. അതിനുവേണ്ടിത്തന്നെയാണ് അവൻ സൃഷ്ടിക്കപ്പെട്ടിരിക്കുന്നതും അതിനുവേണ്ടിത്തന്നെയാണ് അവൻ ആഗ്രഹിക്കുന്നതും ( നമ്പർ 1033, 1035).